Buat Kita, GURU Dangalah...

BAGIKAN:

facebook twitter pinterest line whatapps telegram

Oleh wirnadianhar
Jumat, 30 Mei 2008 05:29:48 Klik: 3181

Guru, Dangalah!

Disadur dari Harian Singgalang, Selasa/27 Mei 2008
 
Guru Dilarang Jual Seragam Sekolah’. Itulah judul barita surek kaba ‘Singgalang’ nan sadang dibaco Kari Garejoh. Barita tu dibaco elok-elok. Karano, Kari tamasuak urang nan pernah jadi korban dek kabijakan guru di rumah sikola anaknyo nan dinilai indak bijak. Anak Kari pernah disuruah kalua dari dalam kelas, hanyo gara-gara indak punyo buku.

Memang, lah manjadi tradisi di nagari awak sajak saisuak. Kalau anak-anak nio basikola, musti mambali pakaian saragam di rumah sikola tu. Malah, ado pulo guru nan mawajibkan anak-anak lansuang manjaik pakaian tu di urang-urang tatantu nan ditunjuak guru atau kapalo sikola. Pokoknyo, urang tuo murik tingga tau beres! Nan paralu, sadiokan sajo pitih baraa sado dimintak.

“Baa gak lain bacaan Kari sakali ko? Biasonyo, barita-barita olahraga nan paliang disukoi,” tanyo Tan Baro.

“Nan iko lain, Tan! Iko masalah awak basamo, masalah sikola jo maso depan anak-anak awak, anak-anak nagari ko,” jawek Kari.

“Mukasuiknyo?”

“Kan lah basuluah matoari, bagalanggang mato rang banyak. Sajak saisuak sampai kini, awak-awak ko taruih dapek kato-kato wajib dari rumah sikola anak. Ado nan wajib mambali pakaian di situ, mambali buku juo di situ. Kasudahannyo, awak-awak ko bantuak urang indak tau atau indak pandai balanjo se dibueknyo. Padohal, kalau mambali pakaian saragam disarahkan ka awak, tantu bisa mancari atau mamiliah nan tadayuang dek saku-saku. Apolai kalau bantuak ekonomi kini, sagalonyo maha. Ijankan pambali pakaian saragam anak, untuak paisi paruik pagi jo patang se lah Allahur­abbi mahanyo. Karano itu, ambo satuju jo pandapek wakia rakyaik di kampuang Uwo ko, supayo guru atau kapalo sikola indak mangga­leh pakaian saragam di rumah sikola. Kacuali untuak baju olahra­ga, karano memang harus pakai merek, tantu iyo di rumah sikola dibali. Tapi, kalau hanyo pakaian saragam, tamasuak pakaian Pramuka bagai, sarancaknyo disarahkan ka urang tuo murik surang-surang,” kato Kari maagiah panjalasan.

“Tapi, kalau disarahkan ka urang tuo murik, bisa-bisa indak saragam dasarnyo. Mukasuik ambo, dek nan banyak pitih dibalinyo bahan maha. Tibo di nan bansaik, dasarnyo kain murah sajo,” Pak Osu manyalo.

“Dek ambo itu bukan masalah. Itu adolah hak mereka, karano memang sasuai jo isi saku-saku urang tuonyo,” baleh Kari.

Agak tamanuang urang salapau tu mandanga apo nan dikatokan Kari. Lah dipikia-pikia bana, batua juo!

“Malah sarancaknyo, kalau ado kakaknyo nan lah di kelas labiah tinggi, bisa pakaiannyo dipakai dek adiaknyo. Jadi, indak musti baru. Baitu juo buku-buku palajaran, ijanlah dituka tiok taun dan musti saragam di saluruh rumah sikola di nagari ko. Supayo, anak-anak nan baru masuak sikola kini, bisa juo mamakai buku kakaknyo. Jadi, ambo bapandapek, kalau lai masih punyo nurani, sarancaknyo guru-guru jo kapalo sikola mandangaan apo nan dikatokan wakia rakyaik tu. Iduik ko lah padiah, ijan dilukoi juo rakyaik jelata ko. Baa manuruik Tan Baro?” Sambuang Kari sambia mamintak panda­pek ka konco palangkinnyo.

“Sapandapek awak! Sarancaknyo, pandidikan awak ko ijan dipamaha juo lai. Pakan kapatang, di surek kaba ko kan ado barita harago buku naiak tigopuluah parsen. Itu aratinyo, buku-buku batambah maha. Untuak itu, kalau ado dana BOS, sarancaknyo batua-batua untuak mambantu pandidikanlah, ijan dibuek-an juo ka paga rumah sikola, apolai kalau dijadikan pulo untuak pandapatan tambahan kapalo sikola, honor komite atau honor guru-guru lainnyo. Bialah masalah guru manjadi tangguangan pamarentah,” hanyo itu nan bisa dikatokan Tan Baro. Espe St.Soeleman
 
Berita Artikel Lainnya